Heilsublogg

14.1.2008 | 05:15

Heilræði móður teresu

Heilræði Móður Teresu:

“Fólk er oft ósanngjarnt, óskynsamt og eigingjarnt:
~ Fyrirgefðu því, þrátt fyrir það.

Ef þú sýnir öðrum góðvild, mun fólk hugsanlega ásaka þig
um sjálfselsku og annarlegar hvatir:
~ Sýndu öðrum góðvild, þrátt fyrir það.

Njótir þú velgengni munt þú eignast einhverja falska vini og raunverulega óvini:
~ Stefndu að velgengni, þrátt fyrir það.

Heiðarleiki og hreinskilni geta gefið höggstað á þér:
~ Vertu heiðarleg(ur) og hreinskilin(n), þrátt fyrir það.

Það sem tekur þig mörg ár að byggja upp, gæti einhver eyðilagt á einum degi:
~ Byggðu upp, þrátt fyrir það.

Það góða sem þú gerir í dag, gleymir fólk oft á morgun:
~ Haltu áfram að gera góðverk, þrátt fyrir það.

Þótt þú gefir heiminum það besta sem þú sem þú átt, verður það aldrei nóg:
~ Haltu áfram að gefa heiminum það besta sem þú átt, þrátt fyrir það.

Sjáðu til, þegar allt kemur til alls, er þetta á milli þín og Guðs:
~ Það var aldrei á milli þín og þeirra, þrátt fyrir allt.”

Heilræði heilags Padre Pio
“Við verðum að muna að trúin er mesta gjöfin
sem Guð hefur boðið manni á þessari jörð,
því að úr jarðneskum manni verður til þegn Himnaríkis.
Við skulum gæta þessarar gjafar af mikilli kostgæfni.
Vei þeim sem gleymir sér; sem gleymir Himnaríki;
þeim sem leyfir trúnni að dofna;
eða það sem verra er, afneitar trú sinni.
Þetta er mesta lítilsvirðing sem hægt er að sýna Guði.”
Friðarbæn (Hl. Frans frá Assisi)
Drottinn, ger þú mig að farvegi friðar þíns, svo að ég færi kærleika þangað sem hatur er, fyrirgefningu þangað sem móðgun er, einingu þangað sem sundrung er, trú þangað sem efi er, sannleika þangað sem villa er, von þangað sem örvænting er, gleði þangað sem harmur er, ljós þangað sem skuggi er.
Veit þú, Drottinn, að ég sækist fremur eftir að hugga en láta huggast, skilja en njóta skilnings, elska en vera elskaður, því að okkur gefst ef við gefum, við finnum sjálf okkur ef við gleymum okkur sjálfum, okkur fyrirgefst ef við fyrirgefum og fyrir dauðann fæðumst við til eilífs lífs.
Amen.

Flokkur: Lífstíll | Facebook